هێرۆ شێخە خەمەکانی ژنان لەسەر تابلۆ دەنەخشێنێ
K24 - هەولێر
هونەرمەند هێرۆ شێخە، شێوەکاری رۆژهەڵاتی کوردستان ئێوارەی رۆژی شەممە 11/12/2021، پێشانگایەکی شێوەکاریی لە "فێرگەی فرێمینگ بۆ وێنەی رۆژنامەوانی" لە هەولێر کردەوە.
ئەم پێشانگایە لە 13 تابلۆی رەنگ ئەکرلیل لەسەر کانڤاس پێکهاتووە و لە چوارچێوەی پڕۆژهی "هێلان" لە چوارچێوەی هەڵمەتی نیشتمانی رووبەڕووبوونەوەی توندوتیژیی دژی ژنان و بە هاوکاری"دامەزراوەی گۆتەی ئەڵمانی" و "سێڤ گەلەری" و فێرگەی فرێمینگ بۆ وێنەی رۆژنامەوانی بەڕێوەچوو.
هێرۆ شێخە، لە سەرەتای کردنەوەی پێشانگاکەدا گوتی: "پڕۆژەیەکم هەبوو بچم لە ماڵی "داڵدەدانی ژنان" بمێنمەوە، ماوەیەک لەگەڵیان بژیم و بتوان لە نزیکەوە بارودۆخیان ببینم و بیگوازمەوە، یان ئەوان بتوانن لە رێی ئەم هونەرەوە ژیانی خۆیان بخەنەڕوو، بەڵام بە داخەوە ئەمە نەکرا. بۆیە هەوڵم دا لە رێی خەیاڵی خۆم لە شوێن ئەو ژنانە دابنێم و ئەوەی رووبەڕووی بوونەتەوە، بۆ سەر تابلۆکانم بیانگوزمەوە".